Ginbuyagyag ni Senate President Pro Tempore Panfilo “Ping” Lacson sa iya nga privilege speech, Septyembre 9, ang kwestyonable kag grandioso nga pagpangabuhi sang apat ka engineers sang Department of Public Works and Highways (DPWH) sa Bulacan.
Gintawag ini ni Lacson nga mga “BGC” Boys ukon ang Bulacan Group of Contractors. Amo ini sanday Henry Alcantara, Brice Ericson Hernandez, Jaypee Mendoza, kag Arjay Domasig. Ang isa pa nga ginapahayag nga “BGC” boy amo ang contractor nga si Edrick San Diego.
Suno kay Lacson, nagagamit ang apat ka mga engineer sang mga alyas kag peke nga government ID kun magsulod kag magsugal sa casino.
“On top of their million-peso wristwatches, signature clothes and sneakers and whatever else lavish lifestyles, these five erstwhile DPWH officials of the Bulacan 1st district engineering office gained them a moniker – ‘BGC boys.’ Not Bonifacio Global City boys but rather – the Bulacan Group of Contractors as they have been known to casino employees. Hindi tambay ng High Street sa BGC ang mga ito — Hell Street siguro, puwede pa, Ginoong Pangulo,” pahayag ni Lacson.
Sa pagkamatuod suno sa senador, si Hernandez ang nagkadto pa mismo sa casino sang Septyembre 1 samtang nga naga-imbestigar na ang Senate blue ribbon committee sa maanomaliya nga flood control projects.
Si Hernandez amo ang gin-cite in contempt sa imbestigasyon sang Senado sang Lunes. Nagtambong siya kahapon sa separado nga hearing sang Kamara kun sa diin gintudlo sini sanday Senator Jinggoy Estrada kag Senator Joel Villanueva nga may kickbacks sa Bulacan flood control projects — akusasyon nga pareho ginpanginwala sang duha ka mga senador.
Sa research sang opisina ni Lacson, nakalab-ot sa P950 million ang gross losses sang lima ka nasambit nga indibidwal bangud sang gambling sa 13 casinos sa Metro Manila, Cebu kag Pampanga. Si Hernandez suno sa iya ang may combined gross losses nga P435 million samtang si Mendoza naman ang may P418 million. Sa pihak nga bahin, may P36.7 million nga losses si Alcantara, may P16.9 million nga pierde si Domasig kag si San Diego ang napierde naman sang P42.4 million.
Sa record sa Newport World Resorts sa Pasay City, minilyon ka pesos ang ila nadag-an sang Aug. 31, 2023 tubtub sang April 4, 2024. Nagdaog si Alcantara sang P4.7 million, si Hernandez sang P189 million, si Mendoza sang P320 million, si Domasig sang P7.37 million, kag si San Diego sang P11.798 million.
“Sinuwete nga kayang sabay sabay na nanalo ang mga ito, Mr. President? O baka naman money laundering scheme,” pamangkot pa ni Lacson.#
