Ipahibalo ni President Ferdinand “Bongbong” Marcos Jr. kay US President Joe Biden ang iya kahandaan nga maghimo sang mas mabakod nga relasyon kag alyansa sa tunga sang Pilipinas kag Amerika.
Kabahin ini sang ginpakigbahin ni Marcos antes nagbiya sa pungsod para sa lima ka adlaw nga official working visit sa Estados Unidos sang Amerika.
Lakip man sa istoryahan kaupod kay President Biden sa bilateral talk subong nga adlaw amo ang Mutual Defense Treaty kag ang Visiting Forces Agreement. Ang MTD amo ang 70 ka tuig na nga kasugtanan sa tunga sang Pilipinas kag Amerika, kun sa diin lakip diri ang katungdanan sang Amerika nga depensahan ang Pilipinas pananglitan may yara sang pagpang-atake.
Ipakita man sang Pilipinas suno kay Marcos ang commitment sini sa alyansa sa Amerika agud mangin instrumento sang kalinong kag paagi para sa pag-umwad sa Asia-Pacific region kag mangin sa iban pa nga bahin sang kalibutan.
Nagalaum man ang presidente nga makapakigkita sa mga business leaders sa US agud nga ma-promote ang negosyo kag investment sa Pilipinas agud nga makabulig sa ekonomiya.
Plano man sini nga magpakigkita sa Filipino community sa Washington.
Ginkumpirma naman ni Presidential Communications Office Secretary Cheloy Garafil nga magaserbe si Vice President Sara Duterte bilang caretaker sang pungsod samtang yara sa Washington sa Amerika si President Marcos para sa official visit.
