Isa sa mga ginalantaw nga mangin dako nga bulig sa krisis nga ginpangatubang subong sang Pilipinas amo ang pagduso sang Billionaire Wealth Tax sa masobra 3,000 ka mga bilyonaryo sa pungsod.
Sa interview sang Bombo Radyo kay Sonny Africa, Executive Director sang IBON Foundation, iya ginpahayag nga ini amo ang labing epektibo nga solusyon agud nga indi na mabudlayan ang publiko sa padayun nga pagtaas sang presyo sang gatong.
Apang suno man sa iya, may ara lang sang pagpanghangkat nga ila pagatubangon kun liwat nga iduso ang tax nga para kun tani sa mga bilyonaryo.
Ini bangud nga pila sa mga mamalidha ang kabahin sang kamara kag senado nga dako gid ang posibilidad nga indi sila magpahanugot sa sa nasambit nga plano.
Ginpakigbahin man ni Africa ang iya pagkadismaya sa pagduha-duha ni President Ferdinand Marcos Jr., sa pagsuspende sang excise tax sa mga produktong petrolyo bisan pa nga tuman na ang epekto sini sa pungsod.
Suno sa iya, kinahanglan nga masolusyunan na ini bangud posible pa nga magsaka ang mga presyo sang produkto indi lang sa gatong kun indi sa mga nagapanguna man nga mga
kinahanglanon sa sulod sang balay.
Dugang pa ni Africa, mas mangin madamo nga mga Pilipino ang magasuprer sa ka-imolon, kun wala sang insakto nga solusyon nga igahatag ang gobyerno.
