Igapadayon sang Senate Blue Ribbon Committee ang imbestigasyon sang gina-alegar anomalya sa mga proyekto sang flood control pagkatapos sang State of the Nation Address ukon SONA sa Hulyo 27.
Ini suno kay Senate Blue Ribbon Committee Chairperson Sen. Erwin Tulfo.
Suno kay Tulfo, indi pa makapatigayon ang komite sang hearing bangod wala pa makahimo sang pinal nga miyembro sini.
Pormal naman nga patigayunon ang paghimo sang komite sa pagbalik sang sesyon sang Senado.
Ginpasiguro ni Tulfo nga ipadayon ang imbestigasyon kag ginpahayag niya nga posible nga magguwa ang bag-o nga mga pangalan sang mga tawo nga nadala sa kontrobersiya.
Plano man niya nga ipatuman ang mas istrikto nga mga patakaran sa paggamit sang mga affidavit kag ang pagdumili sa pagpatawag sa mga surprise witness.
Magapatigayon man sang long-term Philippine Infrastructure Masterplan agud malikawan ang mga proyekto nga ginabase lamang sa pulitika kag mapunggan ang posible nga korapsyon sa infrastructure spending.
Ginasuportahan ni Tulfo ang Senate Bill No. 1360 ukon ang Masterplan for Infrastructure and National Development (MIND) Act, nga nagatinguha nga magtukod sang isa ka bug-os nga estratehiya sang gobyerno para sa mga proyekto sa imprastraktura sa bilog nga pungsod.
