Nagpaandam ang chairman sang Committee on Public Order and Security sang Sangguniang Panlalawigan sa mga security agencies nga indi magpagamit sa mga pulitiko.
Sa interview sang Bombo Radyo kay Board Member June Mondejar, iya ginpahayag nga dapat mahangpan sang tagdumalahan sang mga security agencies nga ginadumilian gid ang pagdala sang armas kun wala ini nasakop sang ila post ukon pwesto base sa duty detailed order.
Suno kay Mondejar,ang violator sini ang posible kaksan sang lisensya sang Supervisory Office for Security and Investigation Agencies sang Philippine National Police kag maapektuhan ang ila operasyon.
Matandaan nga nangin kontrobersyal ang nakit-an nga mga armado nga mga kalalakihan nga nag-intra sa parada sa aktibidad sa Ajuy nga sang ulihi, natukiban nga mga katapo sang isa ka security agency nga gin-imbitar ni Mayor Jett Rojas agud mag-intra sa ila selebrasyon.
Matandaan nga ginreklamo ni Iloilo 5th district Board Member Carol-V Espinosa-Diaz ang presensya sang gin-alegar armado nga mga kalalakihan sa ila banwa.
Sang nagligad nga semana, ginpatigayon man ang hearing in aid of legislation sang Committee on Public Order and Security kun sa diin ginsiling ni Iloilo Police Provincial Office Director Police Colonel Bayani Razalan nga may yara sang administrative violation ang security agency nga Enforcement Security and Investigation Agency.
Suno kay Razalan, base sa imbestigasyon sang Regional Civil and Security Unit 6, ang 12-gauge shotgun nga ginparada sang mga security guard ang lisensyado sa idalom sang pangalan sang Enforcement Security and Investigation Agency.
Apang, sa pagdala ukon bitbit sang pusil sa nagkalain-lain nga lugar, base sa Republic Act 11917 ang nagakadapat nga may Special Duty Detail Order ang security agency apang wala nakahatag ang agency.
Magluwas nga napaslawan maghatag sang Special Duty Detail Order ang Security Agency, wala man ini nakahatag sang Security Providers Contract Agreement kaupod ang kliyente sini kag dapat naka-notaryo.
Base sa kapulisan, bangud sa paglapas sa certain provision, may multa nga baydan ang security agency.
