Isa ka babaye ang patay sa sunog nga naglamon sa isa ka boarding house kag iban pa nga balay sa Brgy. Milagrosa sa Puerto Princesa, Palawan.
Ang napatay nga biktima amo si Lorina Tupaz, 50-anyos.
Nasapwan ang sunog nga lawas sini sa CR sang boarding house.
Napalong na ang kalayo sang nahibaluan sang Puerto Princesa Bureau of Fire Protection (BFP) nga may missing nga tawo.
Nahibaluan nga ang pagkasunog sang boarding house ang nagresulta man sa pagkasunog sang 21 ka mga balay kun sa diin 87 ka pamilya ang nadulaan sang ilistaran.
May ginakabig na nga suspek nga gintudlo sang mga residente kag yara na ini sa kustodiya sang kapulisan.
Antes ang sunog, nagapangayo na sang relocation sa barangay ang suspek bangud apat ka bulan na nga wala nakabayad sa ginaarkilahan nga kwarto.
Naggwa sa imbestigasyon nga ginbasa sang suspek ang cellphone charger kag ginsaksak sa kuryente nga amo ang ginapatihan ginhalinan sang sunog.
Sang nasunog na ang balay, nakit-an nga kompleto ang mga gamit nga dala sini rason nga gindudahan nga siya ang may kahimuan sang pagsunog sa boarding house.
