ILOILO CITY – Nangin venue ang Bombo Songwriting Workshop sang Bombo Radyo Philippines nga ginpatigayon sa Sky City Tower, Mapa St., Iloilo City agud makapakigbahin ang iban nga Ilonggo artists sang ila abilidad sa musika.
Sa interview sang Bombo Radyo kay Elmer John Bolaño, interpreter sang I’ll Be Right By Your Side nga nangin first runner up sa Bombo Music Festival 2020, iya ginpahayag nga nalipay siya bangud madamo naman ang iya nabuligan nga mga songwriters.
Suno kay Bolaño, masami nga ginapamangkot sang mga nagtambong sa workshop amo ang pattern sang lyrics kag may yara man sang nagapamangkot kaangot sa melody.
Suno pa sa natungdan, nagalaum siya nga sa masunod nga Bombo Music Festival, madamo pa ang magasumite sang ila mga obra kag ipakigbahin sa publiko ang ila natun-an sa workshop.
Samtang, suno naman kay Lindy Catequista, interpreter sang kanta nga Break sa Bombo Music Festival 2020, nangin oportunidad man ang Bombo Songwriting Workshop agud nga mangin modelo siya sa iya mga estudayante.
Kabahin sang Bombo songwriting workshop ang mga estudyante ni Catequista nagikan sa Fort San Pedro National High School Special Program for the Arts.
Kaangay ni Bolaño, nagalaum ang natungdan nga madamo man nga mga Ilongg artists ang magpakigbahin sa Bombo Music Festival 2021.
Ang Bombo Songwriting Workshop ang patigayunon tubtob bwas, Pebrero 9.
