ILOILO – Amat-amat na nga nagamay ang naga agi nga mga pribado nga salakyan sa border sang San Joaquin, Iloilo may kaangtanan sa gihapon sa ginapatuman nga enhance community quarantine bangud sa kahangawa sa COVID-19.
Sa interview sang Bombo Radyo kay Punong Barangay Leticia Makabantig, sang Brgy. Sinugbuhan, San Joaquin, Iloilo iya ginpahayag nga hugot ang ila ginapatigayon nga pagbantay sa border agud wala sang makasulod nga indi otorisado.
Suno kay Makabantig, kalabanan sa mga nagasulod kag naga agi sa border ang mga delivery trucks nalang nga may dala nga isda, pagkaon kag iban pa nga produkto nga ginadala sa mga merkado.
Dugang sang natungdan, ang mga delivery truck nga may yara lang sang delivery pass ang ginatugutan nga maka-agi sa border.
Nagpalab-ot naman si Makabantig sang pasalamat sa Local Government Unit sa banwa sang San Joaquin sa bulig kag suporta nga ginahatag nila sa mga frontliners nga nagabantay gid sa mga dalanon kag borders agud maprotektahan ang mga pumuluyo batok sa COVID-19.
