Nadugangan liwat sang bulawan nga medalya sang Pilipinas sa nagapadayon nga 2025 Southeast Asian Games sa Thailand.
Ini matapos nga naghimo sang maragtas ang Filipina tennis star nga si Alex Eala.
Nakuha ni Eala ang iya pinakauna nga SEA Games gold medal sa women’s singles tennis event matapos niya ginlutos ang tiglawas sang host country nga si Mananchaya Sawangkaew, 6-1, 6-2.
Ini ang nagmarka sang iya labing una nga bulawan nga medalya sa SEA Games matapos nga nakakuha lamang siya sang tatlo ka bronze medals sa iya debut sang 2022 SEA Games sa Vietnam.
Ini man ang ikatatlo nga gold medal sang Pilipinas sa women’s tennis sa SEA Games, kasunod nanday Pia Tamayo (1982) kag Maricris Fernandez (1999).
Samtang, nagkampyon man ang Philippines Men’s Softball Team matapos nila ginlutos ang Singapore, 3-0.
Nag-abanse man sa men’s basketball finals ang Gilas Pilipinas matapos ginlutos sang national team ang Indonesia, 71-68.
Sulod man sa finals sang women’s basketball tournament ang Gilas Pilipinas matapos nila ginlutos ang defending champion nga Indonesia, 66-55.
Ini na ang ikaapat nga sunod-sunod nga finals appearance sang Gilas Women sa biennial games.
Sa pihak nga bahin, napaslawan ang Philippine Men’s National Football Team nga makabulsa sang medalya matapos ginlutos sang Malaysia, 2-1, sa bronze medal match sang 33rd SEA Games.
Apisar sini, ginakabig gihapon nga maragtason ang kampanya sang koponan, bangud sila ang nagdala sang men’s football team sang Pilipinas sa semifinals sang SEA Games sa labing una nga tion sa sulod sang masobra tatlo ka dekada.
Yari ang latest medal tally sa 33rd Southeast Asian Games:
1.Thailand- 197-130-93=420
2.Indonesia-80-93-103=276
3.Vietnam-73-72-99=224
4.Singapore-48-51-69=168
5.Malaysia-46-49-109=204
6.Philippines-41-59-126=226
7.Myanmar-3-20-38=61
8.Lao People’s Democratic Republic-3-9-22=33
9.Brunei darussalam-1-3-4=8
10.Timor Leste-0-0-3=3
