Nagpanawagan si Cardinal Antonio Tagle sa mga ginikanan nga giyahan sang maayo ang ila mga kabataan.
Ini matapos ang natabo nga sunod-sunod nga insidente sang school violence sa pungsod.
Suno sa iya, importante nga ipakita sang mga ginikanan, amo man ang mga lolo kag lola sa mga kabataan ang makatawo nga pamaagi sa pagpakig-angot sa iban kag paghimo sang husto nga mga desisyon.
Ginpabutyag man sini ang iya dako nga kasubo sa natabo sa University of Ateneo de Zamboanga City, nga nagresulta sa kamatayon sang duha ka estudyante.
Sa iya misa sa Parish Church of the Holy Sacrifice sa University of the Philippines Diliman, ginkwestyon ni Tagle kun ano ang posible nga nagatulod sa isa ka bata nga maghimo sang kapintasan.
Suno pa sa iya nga importante nga may matuod nga relasyon kag komunikasyon ang mga myembro sang pamilya, ilabi na sa sulod sang puluy-an, imbes nga puro cellphone lang ang ila ginakabalak-an.
Ginpahayag man sini nga indi dapat magsalig sang sobra ang mga kabataan sa video games kag AI bilang giya sa ila mga desisyon, bangod wala ini sang balatyagon.
Dugang pa ni Tagle, antes maghimo sang isa ka desisyon, dapat anay ini pangamuyuan kag may ara sang discernment agud nga magiyahan ang kaisipan sa paghimo sang butang nga gusto sini matabo.
