Nagpabutyag sang iya suporta si Kalookan Bishop Pablo Virgilio Cardinal David sa panindugan ni Philippine Coast Guard (PCG) spokesperson for the West Philippine Sea (WPS) Commodore Jay Tarriela sa pagdampig sa pungsod.
Gin-post ni Cardinal David ang iya opinyon kagab-i kasunod sang nagasingki nga word war sa tunga sang Philippine officials kag Chinese embassy.
Sa iya post, ginpasalamatan sang anay presidente sang CBCP si Lingayen Dagupan Archbishop Socrates Villegas bangud sa iya pagdayaw sa prinsipyo kag kaisog ni Tarriela sa pagpanindugan sa isyu sa West Philippine Sea.
Suno kay Cardinal David, indi lamang ini isyu sa politika, kundi moral kag pastoral, ilabi na bangud nadalahig sa sini nga isyu ang palangabuhian kag kahilwayan sang mga Pilipino ilabi na ang mga manugpangisda.
Gindayaw man ni Cardinal David ang 15 ka mga senador nga nagpirma sang Senate resolution nga nagapabutyag sang protesta batok sa padayon nga pagpang-harass sang China.
Ang ginatumod sini amo ang resolusyon nga ginbaisan kag sang ulihi ginpasar sa Senado sang Lunes nga nagapakamalaot sang mga statement sang Chinese embassy batok sa Filipino officials.
Sang Martes, nauna na nga nag-post si Archbishop Villegas nga nagsiling nga ginadayaw sini si Tarriela bangud apisar sang mga pagtamay sa iya sang pro-China nga mga pulitiko, nagapabilin ini sa iya prinsipyo nga magtindog para sa mga pumuluyo nga Pilipino.
Nagbalos naman si Tarriela kag nagsiling nga ini nga mensahe nagadala sang kaisog kag inspirasyon sa iya samtang nga ginapadayon sini ang iya trabaho nga magpanindugan para sa kinamatarong sang Pilipinas sa West Philippine Sea.
