Indi klaro kag wala sang nagakaigo nga ebidensya, ini ang nangin pahayag ni Senate Minority Leader Alan Peter Cayetano sa mga alegasyon nga naga-angot sa iya sa ginapahayag nga ghost infrastructure projects sa Taguig.
Suno kay Cayetano, handa siya nga magsabat sa bisan ano nga akusasyon kon may yara sang klaro nga ebidensya nga ipakita.
Ginpabutyag man niya nga ang mga national infrastructure projects yara sa idalom sang responsibilidad kag pagpatukod sang national government.
Suno kay Cayetano, masami nila nga gina-monitor ang mga proyekto sa siyudad kag sa ila inisyal nga imbestigasyon, wala sila sang may nakita nga ghost projects sa ila lugar sa Taguig.
Gindugang pa niya nga ila na ginreport sa Department of Public Works and Highways (DPWH) ang mga proyekto nga may deperensya sa konstruksyon, rason nga nagapatigayon sang inspection ang mga opisyal sang ahensya.
Nahibaluan nga nagpabutyag si Senador Panfilo Lacson nga padayon ang iya imbestigasyon sa ginapahayag nga ghost infrastructure projects sa Tagui.
Nakatipon naman sila sang dugang nga ebidensya kag posible nga mga testigo nga makapamatuod sang kuwestiyonable nga slope protection projects nga nagabalor sa kabug-osan nga P3.385 bilyon, lakip ang duha ka proyekto nga may pareho nga lokasyon kag description nga nagpakita sang doble nga pagpondo.
Dugang pa ni Lacson nga ginakonsiderar niya ang direkta nga pagsumiter sang mga ebidensya sa Office of the Ombudsman imbes nga ipaagi pa ini sa Senate Blue Ribbon Committee agud mapadasig ang imbestigasyon.
Suno sa iya, ginhatagan niya sang prayoridad ang mga proyekto sa Taguig matapos nga kwestiyunon ni Cayetano ang iya integridad bilang isa ka public official.
Apang ginpabutyag niya nga ang imbestigasyon wala lamang nagatuhoy sa isa ka tawo kag posible nga may iban pa nga madala.
