May mga tiglawas na ang Catholic Bishops Conference of the Philippines (CBCP) sa kontrobersyal nga National Task Force to End Local Communist Armed Conflict (NTF-ELCAC).
Suno kay Executive Director Usec. Ernesto Torres, gin-aprubahan sang executive committee nga magkuha sang myembro halin sa religious sector bilang kabahin sang pribado nga sektor.
Ang napilan amo sanday Bishop Reynaldo Evangelista kag iya alternate nga si Father Jerome Secillano halin sa Episcopal Commission on Public Affairs.
Plano man sang taskforce nga magkuha sang mga myembro halin sa sektor sang negosyo kag dugang pa halin sa pribado nga sektor.
May gindugang man nga mga regular nga myembro nga amo ang 11 ka ahensya sang gobyerno nga amo ang Departments of Information and Communications Technology; Labor and Employment; Transportation; Tourism; Energy; Trade and Industry; Human Settlements and Urban Development; Foreign Affairs; Environment and Natural Resources; Health; kag Migrant Workers.
Suno kay Torres, ini nga member agencies ang magabulig sa “whole of government approach” sa pagsabat sa ugat sang insurhensya kag amo man ang maga-tutok sa development sang mga barangay nga wala na sang presensya sang mga rebelde.
Halin sang natukod sang 2018, ginpabugal sang task force nga na-dismantle sini ang 69 sa 89 ka guerilla fronts sa nagkalain-lain nga mga barangay sa pungsod.
Sa 20 nga nabilin, isa ang ginapahayag nga aktibo sa Northern Samar, samtang may anum naman ka nagluya nga guerilla fronts sa Luzon, pito sa Visayas, kag anum sa Mindanao.#
