ILOILO CITY – Padayon ang monitoring sang City Disaster Risk Reduction and Management Office matapos nga ginpaidalom sa blue alert ang syudad sang Iloilo bangud sa Typhoon Kammuri ukon may local name nga Bagyo Tisoy.
Sa interview sang Bombo Radyo kay Mr. Darwin Papa, operations officer sang City Disaster Risk Reduction and Management Office, iya ginpahayag nga may yara sang tatlo ka alert level nga gina-activate sa tion nga may yara sang bagyo ukon kalamidad.
Suno kay Papa, ini ang ginalakipan sang white alert nga amo ang pinakamanubo, ginasundan sang blue alert sa diin gina-activate ang emergency operation center kag red alert nga amo ang pinakamataas kun sa diin nakahanda ang tanan nga resources sang syudad.
Ginpahayag ni Papa nga bisan indi mag-agi sa Western Visayas ang bagyo apang mas maayo nga nakahanda ang syudad.
Sa subong suno sa natungdan, ang tanan nga rescue personnel ang on stand-by para sa deployment kag may yara naman sang gin-assign sa emergency operation center.
