ILOILO CITY – Ginakabig ni Iloilo City Councilor Jojo Javellana nga sensitibo ang development sa twin shooting incident nga natabo sang nakaligad nga Enero 19.
Sa interview sang Bombo Radyo kay Javellana, chairman sang Committee on Police Matters, iya ginpahayag nga indi siya anay maghatag sang pahayag bangud nga wala pa man natapos ang imbestigasyon.
Suno kay Javellana, ginakabig pa lang nga suspek ang duha ka mga pulis kag ang duha ka John Does bangud nga wala pa napamatud-an nga sila gid ang nagpatay sa duha ka mga biktima.
Ginpahayag ni Javellana nga nagapangonseho siya tuhoy sa iya mangin desisyon bilang Committee Chairman sang Police Matters sa konseho.
May kaangtanan diri, ginpahayag sang Konsehal nga nakigsapol na siya kay Iloilo City Police Office Director Police Col. Eric Dampal kag natalana naman nga makigsapol kay Police Regional Office 6 Director Police Brigadier General Rene Pamuspusan agud istoryahan ang tuhoy sa kaso.
Lauman sa Martes, Hunyo 9, kadungan sang regular session suno sa natungdan kun ano ang iya mangin pahayag kag lihok tuhoy sa nasambit nga kaso.
