Nag-abot si Chinese Foreign Minister Qin Gang sa Pilipinas agud pabaskugon pa ang relasyon sang China sa pungsod.
Natalana nga magpakigkita si Qin kay President Ferdinand Marcos Jr. subong nga Sabado pagkatapos sang iya nga inisyal nga meeting kaupod kay Department of Foreign Affairs Secretary Enrique Manalo.
Ang pagbisita ni Qin sa Pilipinas ang kadungan man sang pinakadaku nga joint military exercises sang Amerika kag Pilipinas nga may malapit 18,000 troops nga nagapakigbahin sa live-fire kag combat drills tubtub sa Abril 28.
Nahibaluan nga nakatalana man nga magbisita si President Marcos sa Amerika kag magpakig-istorya kay US President Joe Biden sa White House sa Mayo 1.
Isa ini ka pagbag-o matapos nga nangin malain ang relasyon sang Pilipinas sa Amerika sa idalom sang Duterte administration bangud mas ginpili anay sang Pilipinas ang Beijing para sa economic deals kag infrastructure projects.
Ang pagbisita naman sang Chinese official sa Pilipinas ang makabig nga pagpadayon sang serye sang high-level interactions sa tunga sang Manila kag Beijing.
Ginalauman nga maistoryahan sang outcomes sang Philippines-China Foreign Ministry Consultations and Bilateral Consultations Mechanism sa West Philippine Sea nga ginpatigayon sa Manila sang nagligad nga bulan.
Ini ang una nga pagbisita ni Qin sa Pilipinas halin sang gin-appoint siya bilang Foreign Minister kag State Councilor sang December 2022 kag March 2023.
