Gin-report sang militar nga ang research vessel sang China nga nakit-an anay sa kadagatan sa Viga, Catanduanes ang naghulag kag subong yara na malapit sa Northern Samar.
Suno pa sa Armed Forces of the Philippines (AFP), kaina 7:30 sang aga, ang vessel nga “Shen Kuo” ang na-monitor sa kalayuon nga 44.6 nautical miles northeast sang Gamay, Northern Samar.
Suno kay AFP Public Affairs Office chief Col. Xerxes Trinidad, padayon nga gina-monitor sang militar ang nasambit nga presensya sang indi otorisado nga research vessel sa eastern section sang pungsod.
Base sa indi kinaandan nga hulag sang vessel suno kay Trinidad, posible nga gina-survey sini ang area bangud nga ang lugar nga ginakadtuan sini ang indi man makabig nga international highway para sa mga kaangay nga vessels.
Naka-depende sa maritime law enforcement agencies suno pa kay Trinidad kun sakyan kag usisaon kun ano ang sulod sang vessel. Ini bangud una na nga ginpahayag sang AFP nga wala sang may nagasabat sa radio challenges nga ginpaguwa sang militar kag wala man sang tawo sa main deck.
Sa reports sang Tactical Operations Wing, Southern Luzon, nakit-an man ang nasambit nga vessel sang Abril 25 sa kalayuon nga 60.9 nautical miles east sang Rapu-Rapu Island sa Albay.
Ginkumpirma naman ni Philippine Coast Guard (PCG) spokesperson for the West Philippine Sea Commodore Jay Tarriela nga ang Chinese-flagged research vessel ang naghalin sa Shenzhen Port sang Abril 13 kag naglabay pa sa Itbayat kag Basco sa Batanes sang Abril 22 antes ini nagkadto sa kadagatan sang Catanduanes kun sa diin na ini na-monitor sang AFP.#
