Ipatuman na bwas, Mayo 26, umpisa las 12:01 sang kaagahon ang city-wide border control kag closure sang tanan nga non-essential businesses ukon negosyo sa syudad sang Iloilo.
Magalawig ini tubtob Mayo 31, 2021 kasunod sang pagtimbuok sang kaso sang COVID-19 sa syudad.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang ini nga dako nga tikang ang ginalauman nga makapugong sang pagsurge ukon pagsaka sang kaso sang COVID-19 sa syudad.
Suno kay Treñas, ang entry kag exit padulong kag halin sa Iloilo City pinaagi sa land, sea kag air travel ang indi pagpahanugutan tubtob 11:59 sa gab-i sang Mayo 31, magluwas sa mga masunod nga katuyuan ukon indibidwal:
- trabaho;
- medical needs;
- pag-access sang government services;
- transportasyon sang mga goods kag construction materials;
- humanitarian purposes; kag
- Returning Overseas Filipino workers, Locally Stranded Individuals kag Authorized Persons Outside Residence
Ginmanduan man ang border enforcers kaangay sang Philippine National Police kag Philippine Coastguards nga pangayuan ang mga byahero ukon travelers sang mga dokumento nga magasuporta sang katuyuan sang ila pagbyahe kaangay sang company identification cards (ID) kag medical certificate.
Yari naman ang mga establisemento nga pahanugutan magbukas ukon may full on-site capacity:
- Public kag private nga mga ospital;
- Health, emergency kag frontline services nga ginalakipan sang dialysis centers, chemotherapy centers, disaster risk reduction management offices kag iban pa;
- Manufacturers sang mga bulong, vitamins, medical supplies, packaging kag distribution;
- Mga industriya sa agrikultura kaangay sang fishery kag livestock;
- Energy sector (oil, gas, kag power companies);
- Telecommunications companies;
- Airline kag aircraft maintenance;
- Funeral services;
- Mga establisimento sang repair kag maintenance sang machinery kag equipment;
- Mga manunudlo nga nagalunsyar sang online classes;
- Printing establishments;
- Lawyers ukon mga abogado nga nagahatag sang legal services; kag
- iban pa nga establisemento nga nagabaligya sang mga kinahanglanon sa balay ukon goods via online
Samtang, siraduhan naman ang Iloilo Esplanades, mga playground kag courts sa tanan nga pampubliko nga mga plaza.
Tanan nga mass gatherings ang dumilian, magluwas sa religious gatherings apang subject sa 10 percent seating capacity.
Ang tanan naman nga media establishments ang subject sa 50 percent on-site capacity.
30 percent on-site capacity naman ang sa Business process outsourcing (BPO) companies.
Ginpahayag ni Mayor Treñas nga ang border restrictions sa syudad sang Iloilo ang epektibo para sa tanan kaangay sang Guimaras kag Negros Island kag iban pa nga probinsya sang Panay.
Mataandan nga una na gin-athag sang COVID-19 team sang Iloilo City Government nga ang mga tawo nga may essential nga trabaho kag tuyo lamang ang mahimo makasulod sa syudad kadungan sang ipatuman nga border restrictions.
Ang qurarantine control points ukon ang identified nga entrance kag exit sang syudad ang yara sa Barangay Lanit, Tagbak, Bitoon, kag Ungka sa Jaro, Hibaoan sa Mandurriao, kag Mohon sa Arevalo, Iloilo City.
