Wala nabalaka ang House prosecution panel batok sa mga trolls kag pagpalapta sang fake news nga nagatuyo nga gub-on ang kredibilidad kag reputasyon sang mga prosecutors nga nagaduso sang accountability batok kay Vice President Sara Duterte kaangot sa natalana nga impeachment trial sini.
Sa interview sang Bombo Radyo kay House prosecution panel spokesperson Rep. Zia Alonto Adiong, iya ginpahayag nga indi na sila makibot sa pagdamo sang disinformation kag online attacks batok sa mga miyembro sang prosecution panel.
Suno kay Adiong, nagapabilin nga nakasentro ang panel sa ila konstitusyonal nga mandato kag indi sila maapektuhan sang mga pagtuyo nga higkuan ang ila nga integridad bilang mga prosecutor sa impeachment proceedings.
Ginsiling pa ni Adiong nga ang nagapanguna nga salandigan sang prosecution panel amo ang kamatuoran, mga dokumentado nga ebidensiya, kag ang ginapatuman nga proseso sang kasuguan.
Dugang niya, kabahin sang demokratiko nga salabton ang maayo kag patas nga trial gani padayon sila nga magatrabaho agud masiguro nga maduso ang transparency, accountability, kag rule of law sa kabilugan nga proseso.
