ILOILO – Patigayunon subong nga adlaw, alas dos sang hapon ang Clarificatory Hearing sa kaso ni Adonis Hontiveros nga gina alegar ginluthang patay sa check point sa Sara, Iloilo.
Madumduman nga napatay si Adonis Hontiveros, 26 residente sang Brgy. Panantan Elizalde Ajuy matapos nga ginluthang sa checkpoint sang 2nd platoon mobile force company sa Brgy. Zerrudo Sara, Iloilo.
Sa interview sang Bombo Radyo kay Atty. Samson Go, pinuno sang Legal Division sang Regional Internal Affairs Services sang Police Regional Office 6 nga nagat serbe man nga summary hearing officer sang nasambit nga kaso iya ginpahayag nga natapos na ang pre hearing conference sang nagligad nga adlaw kun sa diin ginpangmarkahan ang mga ebidensya kag ginpresentar ang mga factual issues.
Suno kay Go, paagi sa clarificatory hearing ma klaruhan ang mga butang nga indi klaro sa papeles kag mga affidavit sang mga respondents kag compliants.
Dugang sang natungdan, matapos nga maklaro ang tanan irequire sila nga magpasa sang position papers sa sulod sang 10 ka adlaw apang kun indi pa ini maklaro ipatawag man ang iban pa nga miyembro sang Philippine National Police kag tanan nga may kaangatan ukon mahimo mangin source sang impormasyon natuhoy sa nasambit nga kaso.
Maga atubangay man sa nasambit nga hearing ang mga pulis nga gina alegar nag luthang sa biktima nga sanday Pol. Lt. Col. Mario Baquiran, head sang 2nd mobile force company, Pol Corp Alfredo Bartulo Jr., Pol Corp. John Michael Parcia, Patrolman Christopher Paclibar kag ang pamilya Hontiveros
