Ginpangayuan sang sabat ni Senator-judge Erwin Tulfo ang former state auditor sang Commission on Audit–Intelligence and Confidential Funds Audit Office (COA-ICFAO) nga si Atty. Roderick Wamil kun gin-require sang COA nga magpaathag ang Office of the Vice President (OVP) kaangot sa gin-report nga paggasto sang ₱2 milyon kada adlaw para sa isa ka “safe house.”
Suno kay Tulfo, kaangay nga tuman ka dako ang amo nga kantidad kag luyag sini mahibaluan kun kinahanglan nga i-justify ini sang OVP.
Ginsiling naman ni Wamil nga wala sang nangin audit finding ang COA tuhoy sa balor sang gin-gasto bangud wala sang gintalana nga spending threshold para sa confidential funds sa idalom sang Joint Memorandum Circular.
Ginpaathag niya nga dokumento lang ang nangin basehan sang audit sang COA kag wala sila nagpatigayon sang pisikal nga beripikasyon sang “safe house.”
