Nagpasalig ang Commission on Elections (COMELEC) Region 6 sang mas mabaskog nga pagbantay sa ‘vote buying’ kaangot man sa nagahilapit nga 2025 midterm elections.
Sa interview sang Bombo Radyo kay Atty. Dennis Ausan, Regional Director sang COMELEC 6, iya ginpahayag nga ginaplano sang talatapan nga maglunsar sang Committee on Kontra Bigay nga magaserbe nga government approach agud makakoordinar sa pila ka ahensya sang gobyerno sa pagkampanya sang ginadumilian nga pagpamakal sang boto.
Suno kay Ausan, kinahanglan sang partisipasyon sang law enforcement agencies batok sa vote buying kon sa diin, lakip diri ang National Bureau of Investigation (NBI), Department of Justice (DOJ), Bangko Sentral ng Pilipinas (BSP), Department of Information and Communications Technology (DICT), kag iban pa.
Ginpahayag man sini nga luwas sa nasambit nga mga ahensya, yara man ang Philippine National Police (PNP), Philippine Coast Guard (PCG), Armed Forces of the Philippines (AFP), Bureau of Fire Protection (BFP) ,kag Department of the Interior and Local Government (DILG).
Ginpasangkad man sang COMELEC ang pagbantay sa online vote buying bangud mas lapnagon ini sa subong nga tyempo.
Nagpakig-angot man ang talatapan sa mga online money banking agud nga mapasiguro nga wala sang makalusot sa pagbaligya sang boto.
