Wala ginakabig sang Commission on Elections nga premature campaign ang mga nakatapik nga campaign paraphernalias ukon tarpaulin sang mga ginabati-bati nga magakandidato sa 2025 midterm elections.
Sa interview sang Bombo Radyo kay Atty. Dennis Ausan, Regional Director sang Commission on Elections Region 6, iya ginpahayag nga wala sang layi nga nagadumili sa pagpangtapik sa mga tarpaulin.
Suno kay Ausan, kun tulukon, premature campaigning gid man ini apang wala sila sang gahum nga pangsawayon ang mga kandidato nga nagabutang sini bangud wala sang kasuguan nga nagasuporta diri.
Nahibaluan nga sa Pebrero 11 magasugod ang 90-day campaign period para sa national candidates kag sa Marso 28 naman ang pag-umpisa sang 45 days campaign para sa local candidates.
Natalana ang eleksyon sa Mayo 12,2025.
