Ginkumpirma ni Provincial Commission on Elections (Comelec) Supervisor Atty. Renier Layson nga nabaton na nila ang sulat ni 5th District Board Member Atty. Carol-V Espinosa-Diaz nga nagahingyo nga ipaidalom ang Ajuy sa COMELEC control para sa palaabuton nga May 2025 Elections.
Ang sulat napetsahan Oktubre 2,2024 kag nasaad diri nga nagapangatubang ang banwa sa mga pagpamahog sa pulitika bangud sang ginaalegar lapnagon nga vote buying, harrasment, kag indi husto nga pamaagi sang kampanya.
Sa interview sang Bombo Radyo kay Atty. Layson, iya ginpahayag nga indi ini mahapos nga ipatuman bangud nga may yara sang parameters nga mangin basehan.
Matandaan nga una naman nagsulat si Mayor Jett Rojas nga ipadalom ang Ajuy sa COMELEC Area of Concern kun sa diin gin-endorso ini ni ayson sa Joint Peace and Security Council (JPSC).
Nahibaluan nga ang magabunggoanay sa Ajuy sa pagka-alkalde kag bise alkalde ang lunsay magpamilya.
Si Mayor Rojas ang magapapili sa pagka vice mayor kaupod si Sangguniang Bayan Member Loida Espinosa nga magapapili naman sa pagka-alkalde.
Sa pihak nga kampo, magapadalagan sa pagka- alkalde si Board Member Espinosa-Diaz nga pakaisa ni Loida Espinosa.
