Nagakatabo na subong ang ginakahadlukan nga “constitutional crisis” kun si Senate President Juan Miguel Zubiri pa ang pahambalon.
Ini ang sa tunga sang padayon nga pagduso sang Charter change (Cha-cha) paagi sa people’s initiative nga gina-alegar ginapamunuan sang mga myembro sang Kamara.
Suno kay Zubiri, ginhimo man nila ang tanan agud malikawan ini nga krisis, apang sa masubo nga bahin, amat-amat na ini nga nagakatabo.
“The Senate still maintains that this people’s initiative, in its current form and how the signatures are being collected, is flawed and unconstitutional. We have warned about a possible constitutional crisis and tried to avoid it. But unfortunately, it seems that this is slowly happening,” pahayag sang senate president.
Ginkumpirma man sini nga nabaton na niya ang sulat ni Speaker Martin Romualdez nga napetsahan sang Enero 25 kun sa diin na-mensyonar ang alternative people’s initiative nga ginapangunahan sang Senado sa ginaduso nga mga pagbag-o sa economic provisions sang 1987 Constitution.
Suno kay Zubiri, wala naistoryahan sang Senado ang ginatumod ni Romualdez nga alternative people’s initiative.
“As for his suggestion of an alternative people’s initiative emanating from the Senate, there have been no discussions on this… We believe that any legitimate people’s initiative must be genuinely led by the people,” dugang sini.
Antes sini, nag-file sang manifesto ang Senado subong nga semana nga nagakondena sang people’s initiative — tikang nga nagatuyo nga amyendaran ang Konstitusyon paagi sa pagtugot sa Senado kag Kamara nga magboto sang tingob sa constitutional amendments paagi sa constituent assembly.
Nagpaandam ang mga Senador nga kun may constituent assembly, indi makasarang ang boto sang 24 ka mga senador sa 316 nga mga myembro sang House of Representatives.
Pila man ka mga senador, lakip si Senator Imee Marcos, ang nagtudlo sa iya pakaisa nga si Speaker Romualdez nga amo ang tawo sa likod sang people’s initiative.
Nagsabat naman si Romualdez nga “marites” ang iya pakaisa nga si Senator Imee ukon nagapamati-bati sa mga tsismis. Ginpanginwala man sini nga may labot siya sa nagapadayon nga people’s initiative.#
