Magalibot ang team sang Department of Agriculture (DA) agud mag-inspect sang mga warehouse sa tunga sang alegasyon nga may manipulasyon sa stocks agud nga ma-justify ang pagsaka sa presyo sang bugas sa pungsod.
Suno kay Agriculture Assistant Secretary and deputy spokesman Rex Estoperez, sa idalom sang Rice Tariffication Law ukon Republic Act 11203, wala na sang regulatory powers ang National Food Authority nga mag-inspeksyon sa warehouses, apang ang Department of Agriculture ang may yara gihapon sang gahum nga magbisita sa rice storage facilities.
Ang pagbisita sa mga pasilida ang himuon sang DA-Inspectorate and Enforcement Office sa pagpanguna ni Assistant Secretary James Layug.
Ginpahayag ni Estoperez nga may nakit-an nga saka sa presyo sang bugas bangud sa ulihi pa nga bahin sang Septyembre ukon sa temprano nga bahin sang Oktubre magaumpisa ang ani sang humay.#
