Naintindihan sang More Electric and Power Corporation nga tuman ka daku ang epekto sang wala ginalauman kun kaisa nga temporaryo nga power interruptions bangud man kun kaisa sa ginpatigayon nga manual load dropping sang National Grid Corporation of the Philippines ukon NGCP.
Ang manual load dropping ginapatuman bilang kabahin sang pagdumala sang suplay sang kuryente sa transmission grid kun sa diin nagakaapektuhan ang operasyon sang distribution utility.
Sa interview sang Bombo Radyo kay Angel Tan, spokesperson sang More Electric and Power Corporation, iya ginpahayag nga madamo nga consumers ang apektado sa kada pagpatuman sang manual load dropping.
Pahayag pa niya nga nagaka-apektuhan sini ang mga negosyo, ilabi na ang mga establisyemento nga nagasalig sa padayon nga suplay sang kuryente para sa ila operasyon.
Pahayag pa ni Tan, maayo naman kun magbalik na ang Therma Visayas Inc. (TVI) Units 1 kag 2 agud makadugang sa power supply agud makabulig man para sa power system.
Dugang pa ni Tan, apisar nga ginakulang sang power supply sa pila ka mga lugar nga ila ginaserbisyuhan, ginatingwaan gid nila nga padayon ang ila nga operasyon agud mapabilin nga stable ang suplay sang kuryente para sa ila mga consumer.
Nagapangabay naman ang MORE Power sa publiko sang padayon nga suporta kag paghangop bangud ginatingwaan gid nila nga madala ang mas maayo nga serbisyo para sa ila nga mga consumer.
