ESTANCIA, ILOILO – Naglab-ot sa P1.2 milion ang balor halit sa nagluntad nga sunog sa Purok 1, Brgy. Botongon, Estancia, Iloilo.
Pasado 5:00 kahapon sang hapon, Hulyo 3, sang nagluntad ang sunog kag pasado 6:00 na sang kasisidmon sang napalong ang kalayo.
Sa interview sang Bombo Radyo kay Senior Fire Officer 4 Oldarico Delos Santos, municipal fire marshall sang Estancia, Fire Station, iya ginpahayag nga nag-umpisa ang sunog sa balay ni Bobby Mangalay.
Magluwas sa balay ni Mangalay, naupos man sa sunog ang mga balay nga ginapanag-iyahan nanday John Rider Nobleza Rey Decripito kag Pepito Decripito.
Naulamid man sa sunog ang isa ka building nga nagaserbe nga bodega sang bakery kun sa diin ginabanta nga nagalab-ot sa P800,000 ang balor sang halit santo sa tag-iya.
Ginapahayag nga napabay-an nga niluto ang ginhalinan sang sunog.
