Mangatubang sang 10 ka sampaw-sampaw nga mga kaso ang isa ka landowner bangud sang pagdala sang malaba nga mga armas kag ginaalegar nga pagpalupok sa luxury resort sa Sicogon Island sa Carles, Iloilo.
Ginkilala ang arestado nga si Dave Sarrosa nga nadala naman sa kustodiya sang pulis sa mainland Carles kaupod ang iya apat ka bodyguards matapos ang negosasyon sang awtoridad.
Sa interview sang Bombo Radyo kay Police Brigadier General Randulf Tuaño, director sang Police Regional Office VI, iya ginpahayag nga ipasaka ang mga panumbungon batok sa lima subong nga adlaw, Hunyo 27.
Ang mga complaint amo ang illegal possession of firearms, serious illegal detention, attempted murder, robbery, destruction of property, illegal trespassing, indiscriminate firing, alarms and scandal, grave threats, kag malicious mischief.
Suno kay Tuaño, Huwebes sang hapon sang ginpahibalo sa pulis nga may nagpalupok sa resort nga gilayon nga ginrespondehan sang Carles Municipal Police Station.
Ginaalegar nga nagpalupok sang armas sanday Sarrosa sa mga sakayan, sa mga propiedad, kag iban pa nga parte sang resort apisar nga may 11 pa ka mga empleyado nga didto sa resort sang amo nga tion.
Pahayag sang director, may tatlo sila ka organic personnel nga naka-assign sa amo nga lugar, apang bangud armado kag may mga kaupod sanday Sarrosa, nagmandu si Tuaño nga indi anay maghulag kag hulaton ang dugang nga pwersa sang kapulisan.
Gin-negosyar sang mga pulis si Sarrosa nga sang amo nga tion nagapamahog nga maghimo sang self-inflicted harm, samtang gin-amat-amat naman sa pag-rescue ang 11 ka mga empleyado.
Nag-ugat ang aktwasyon ni Sarrosa sa madugay na nga away sa pagpanag-iya sang duta sa amo nga lugar.
Gin-athag ni Tuano nga gwa na ang PNP sa isyu kun sin-o ang matuod nga nagapanag-iya sang duta apang obligasyon nila ang pagpasiguro sang kalinong kag katawhay. Naggwa man sa pagpangusisa sang regional director nga awtorisado si Sarrosa sa paghupot sang tatlo ka short firearms apang expired ini tanan.
Nahibaluan nga mismo si Sarrosa ang nagkuha man sang video nga amo ang naglapta sa social media kun sa diin makit-an siya nga may dala ini nga high powered-firearm.
Ginpahayag man sini nga nagakagutman ang mga residente sang Sicogon Island bangud sang direkta nga resulta sang napalpak nga partnership sa Ayala Land. Sa video, makapila ka beses man ini nga nagpamuyayaw kag gintawag ang amo nga kumpaniya nga “land grabber” kag “stupid”.#
