Ginplastar ni Retired Chief Justice Hilario Davide Jr. nga ang two-thirds vote nga gina-require para ma-convict ang akusado sa isa ka impeachment trial ang dapat nga i-compute base sa qualifications sang senator-judges.
Ginpaathag ini ni Davide paagi sa iya legal memorandum nga ginpasa sa Senate impeachment court kag ginbasa sang Clerk of Court nga si Atty. Renato Bantug Jr.
Si Davide ang isa sa mga amici curiae ukon “friends of the court” nga gin-imbitar para maghatag sang legal opinion tuhoy sa 16-vote threshold para ma-convict si Vice President Sara Duterte.
Suno kay Davide, indi malakip kag dapat indi paglakip sa phrase nga “all the Members of the Senate” ang sin-o man nga yara sa luwas sang pungsod, gin-suspend, ukon wala mahibaluan kon sa diin ang nahamtangan sini.
Ini nga posisyo ni Davide ang may kaangtanan sa isyu nga kun ang phrase sa Article XI, Sec. 3 sang 1987 Constitution ang dapat magpatuhoy sa full membership sang Senado nga 24 ukon ang mga myembro lang nga legal kag pisikal nga may ikasarang ang mahimo magpartisipar sa pagboto.
Ginpatpat man sang former Supreme Court chief nga ang kaso ni Avelino vs. Cuenco ang makabig sang impeachment court nga may yara sang persuasive value.
Ang Avelino vs. Cuenco sang 1949 ang isa ka landmark Philippine Supreme Court case sa isyu sang Senate quorum.
Sang amo nga tion, may 24 ka myembro ang Senado apang matapos nagbiya ang iban nga senador, 12 ang nabilin kag gin-elihir si Mariano Cuenco bilang Acting Senate President.
Ang Supreme Court naghimo sang ruling nga ang 12 ka nabilin nga senador ang bastante na agud makahimo sang quorum gani valid ang pag-elect kay Cuenco.
