ILOILO CITY – Nagdangat sa 2, 300 ka mga tawo ang napatay sa Libya kag linibo pa ang gin-report nga missing matapos ang lapnagon nga flash floods nga nagguba sang mga river dams.
Madamo na sang mga pungsod ang nagtanyag nga magpadala sang bulig kag rescue teams sa nasambit nga pungsod.
Sa syudad sang Derna nga puluy-an sang ginabanta 100, 000 ka mga residente, madamo nga mga multi-storey buildings sa river banks ang natiphag kag ang mga panimalay kag salakyan ang gin-anod sang baha.
Gin-report naman sang Libyan emergency services nga ang initial nga death toll ang masobra 2, 300 sa Derna pa lamang kag masobra 5, 000 ang missing kag 7,000 ang pilason.
Ang pagbaha sang resulta sang wala untat nga pag-ulan bangud sang Storm Daniel nga nag-landfall sa Libya sang Domingo matapos naglaslas man sa Greece, Bulgaria kag Turkey.
