ILOILO CITY – Gina-imbestigaran na sang Department of Tourism ang mga reports nga indi orihinal ang pila sa mga video nga kabahin sang audio visual presentation sang bag-o nga tourism campaign nga “Love the Philippines”.
Ang bag-o nga tourism campaign nga nagabalor sang P49 million ang ginbulos sa 11 ka tuig nga slogan nga “It’s More Fun in the Philippines” nga gin-adopt sa term ni the late Tourism Secretary Ramon Jimenez Jr.
Sa ika-16 segundos sang campaign video, makita ang drone shot sang Tegallalang Rice Terraces, sa Ubud, Bali, Indonesia.
Ini ang gin-contribute sang Filmovar sa website nga storyblocks.com.
Sa ika-19 nga segundos sang video, makita ang manugpangisda nga nagahaboy sang net.
Base sa verification, ini ang kuha sa Thailand sang RedCupStudio.
Indi man original ang ika-21 segundos nga bahin sang promotional material.
Ini ang slow motion landing sang passenger plane nga kuha sang Grey Coast Media sa Zurich, Switzerland.
Sa ika-25 nga segundos sang video, makita ang mga nagalumpat nga dolphins.
Indi matumod kun sa diin ini nga lugar, apang una ini nga gin-upload sang contributor nga SceneLabPro sa website nga storyblocks.com.
Sa ika-36 segundos nga bahin sang promotional material, gingamit sang advertising agency ang video sang isa ka babayi nga naga-drive sang Sand Dune Buggy sa Dubai, United Arab Emirates.
Suno kay Tourism Secretary Christina Garcia Frasco, nagatipon na sang impormasyon ang ahensya agud nga matumod ang kamatuoran sa likod sang mga alegasyon.
Dugang pa niya, makapila ka beses nga gin-confirm sang ahensya ang originality kag ownership sang mga videos sa ila contracted advertising agency nga DDB Philippines.
Nagpasalig man ini nga pasabton ang advertising agency kun may yara gid man sang lapses sa ila nga bahin.
Sa pihak sang mga alegasyon, nagpasalamat si Frasco sa maayo nga pagbaton sang mga Filipinos sa bag-o nga tourism campaign sang ahensya.
