ILOILO – All set na ang Department of Education sa pagbukas sang klase sa bwas, Oktubre 5.
Sa interview sang Bombo Radyo kay Dr. Roel Bermejo, DepEd-Iloilo Schools Division Superintendent, iya ginpahayag nga ang pagbukas sang klase bwas ang kadungan sang World Teachers’ Day celebration.
Suno kay Bermejo sa subong nga school year, ipatuman na ang blended, modular, kag distance learning
Ginpahayag ni Bermejo nga ang modules ang ginhimo sang mga eksperto sa tagsa ka mga eskwelahan kag nag-agi sa quality assurance.
Subong nga tuig, ginkalipay sang DepEd bangud nalab-ot nila ang 99% nga target sa enrolees.
Sa Kindergarten, 105% ang enrolees, 95.32% sa elementary, 101% sa junior high school, kag ang pinakamataas nga enrolment ang narecord sa senior high school nga nagdangat sa 108%.
Gin-athag man ni Bermejo nga sa subong, padayon sa gihapon ang pagbaton nila sa mga late enrolees.
Gin-ako man sang natungdan nga may mag lugar sa Iloilo nga may yara sang problema sa internet connection, apang ila na ini nga ginapangitaan sang solusyon.
Sa pagbukas sang klase bwas, may simultaneous nga flag raising ceremony kag ringing of school bell.
Nagpanwagan man si Bermejo sa tanan nga magbuligay sa pagpangamuyo agud malampuwasan ang ini nga pagpanghangkat sa sektor sang edukasyon.
