Magauntat na ang Department of Foreign Affairs (DFA) sa pagtigana sang passport appointment slots para sa mga recruiter sang overseas Filipino workers (OFWs) umpisa sa Marso 14.
Ginmandu ini ni Foreign Affairs Secretary Teodoro Locsin Jr. matapos nga ginpahanugutan na sang DFA ASEANA sa Parañaque ang walk-in passport applications para sa OFWs sa kondisyon nga may dala lang nga supporting documents.
“Recruiters will no longer be given passport slots. They will have to go online like everyone else,” suno sa tiglikom sa post sa Twitter.
Una diri, may privilege ang recruitment agencies sa pagkuha sang passport appointment slots kag ini nga slots ang gina-reserba para sa ila nga recruits.
May kaangtanan sa sini nga development, ginpahayag ni Locsin nga, “This won’t affect OFWs. From March 14, OFWs will be able to walk-in with supporting (documents). This should make passport appointments easier and as it should be, absolutely free for all.”
Ini nga pagbag-o ang kasunod man sang reklamo nga may mga grupo kag/ukon indibidwal nga nagapataw sang sukot sa passport applicants kabaylo sang appointment slot. Ini apisar nga libre lang ini sa idalom sang DFA system. ##
