Gin-akusaran sang Department of Foreign Affairs (DFA) ang European Parliament nga naga-attempt nga pasiblabtan ang eleksyon sa Pilipinas.
Ini ang kasunod sang tikang sang European Parliament nga pag-adoptar sang resolution batok sa ginapahayag pagpang-abuso sa tawhanon nga kinamatarong sa Pilipinas.
Gintawag sang DFA nga indi patas kag wala sang basehan ang resolution bangud kun ang ahensya ang pahambalon, gina-uphold gid sang Pilipinas ang kinamatarong sang mga pumuluyo.
Una diri, gin-adopt sang European Parliament ang motion — may 627 votes in favor, 26 against, kag 31 abstentions.
Na-cite sa resolution ang gina-alegar human rights violations sa Pilipinas nga naga-target sa mga suspected drug offenders.
Gin-cite man ang red-tagging activities batok sa mga aktibista kag kritiko sang Duterte administration.
Suno naman sa DFA, ang resolution ang gingatungan lang sang European supporters sang libelous journalists kag bitter nga mga critics sang administrasyon ni Presidente Rodrigo Duterte.
Ginrason man sang DFA nga na-address na ang mga alegasyon sang human rights violations sa pungsod lakip na ang ginapahayag extrajudicial killings nga nakomiter bangud sang “war on drugs” ni Presidente Duterte.
Ginhangkat man sang DFA si EU Parliament Vice President Heidi Hautala nga pamatud-an ang mga impormasyon nga nalakip sa resolution antes maghimo sang ila nga demand.
Indi ini ang una nga tion nga na-criticize ang human rights situation sa Pilipinas sa idalom sang current administration.
Bangud sa war on drugs, matandaan nga sang Agusto, naghatag man ang International Criminal Court Pre-Trial Chamber sang go signal sa ICC Prosecutor agud nga mag-patigayon sang pormal nga imbestigasyon sa Pilipinas. Ini nga imbestigasyon ang temporaryo nga nasuspinder sang bulan sang Nobyembre. ##
