Gin-updan sang pamilya, mga taga-suporta, mga abyan, kag mga opisyal ang ceremonial oath taking ni former Iloilo City Mayor kag newly-appointed DILG Undersecretary Jed Patrick Mabilog sa UP Visayas Auditorium subong nga adlaw, Mayo 15.
Lakip sa mga nangin bisita amo sanday Senator JV Ejercito, Bicol Saro Representative Terry Ridon, Iloilo City Lone District Rep. Julienne “JamJam” Baronda, kag hinablos sang former mayor nga si Iloilo City Councilor Sheen Marie Mabilog.
Antes ang event subong nga adlaw, una na nga nagpanumpa si Mabilog kay Executive Secretary Ralph Recto sa Malacañang sang Mayo 13 amo man sa atubang ni Interior Secretary Jonvic Remulla.
Si Mabilog ang napilian sang Palasyo nga Undersecretary for Public Safety sa interior department kun sa diin nalakip ang disaster preparedness kag community empowerment.
Sa iya mensahe sa seremonya, ginpahayag sini nga ginpangamuyo gid sini ang pagpauli sa Iloilo City agud nga makaalagad liwat sa mga Ilonggo.
Pahayag sini, sang nag-atubangay sila ni Remulla, ginpahayag sini nga gin-reserve gid ang posisyon para sa iya. Ginpahanumdom man sa iya nga indi magtimalos bangud para ini sa reporma.
Gintawag man ni Mabilog ang appoinment sa iya bilang “renewed mission” — isa ka oportunidad agud nga mabuligan indi lamang ang mga Ilonggo kundi ang mga Pilipino.
Matandaan nga sang 2024 sang nagbalik si Mabilog sa Pilipinas matapos nga gin-link anay ni former President Rodrigo Duterte sa iligal nga droga. Nakabaton si Mabilog sang executive clemency halin sa Malacañang sang 2025 — ang tuig kun sa diin gindakop naman si Duterte kag gindala sa The Hague.
