Ginahulat pa ang duha ka District Engineering Offices sa probinsya sang Iloilo nga magsumiter sang ginapangayo nga mga detalye kag dokumento sang Sangguniang Panlalawigan agud makapatigayon na sang imbestigasyon sa mga flood control projects sa probinsya.
Ini angot sa privilege speech ni 2nd District Board Member June Mondejar, nga nagpanawagan nga imbestigaran ang mga proyekto halin sang tuig 2022 tubtob subong nga tuig 2025 nga nalista sa “Sumbong sa Pangulo” website.
Ang imbestigasyon nagatuyo man nga magpalab-ot sa opisina sang Presidente kun may ara guid nga mga proyekto ukon laban lang diri mga ghost projects.
Sa subong, ang mga nakapasa sang dokumento amo ang First District, 2nd District, kag 4th District, samtang ginahulat pa nga magpasa ang 3rd kag 5th District.
Suno kay Iloilo Provincial Vice Governor Lee Ann Debuque, ginpahayag sini nga icheck anay ang kabug-usan nga mga dokumento agud kun may kulang, makahimo sang dugang nga follow-up communication.
Ginadumilian man nila nga matapos ang tuig nga wala pa na-assess ang mga dokumento.
Dugang pa sang Bise Gobernador nga ginatagaan gid nila sang importansya ang insakto nga proseso agud nga mangin fair sa tagsa ka distrito ang ila mga tikang nga ginabuhat kag para mangin transparent ini sa publiko.
