Gina-sigurado na sang Department of Energy (DOE) nga indi magpalya ang power distribution facilities bilang preparasyon sa La Niña sa Pilipinas sa masunod nga binulan.
Bangud sa ginalantaw nga indi kinaandan nga pagbubo sang ulan, posible suno kay Energy Secretary Raphael Lotilla nga maapektuhan gid sang baha ang distribution facilities.
Suno naman kay DOE Assistant Secretary Mario Marasigan, indi mangin problema ang power supply apang ang transmission kag ang distribution facilities ang makabig nga vulnerable sa sini nga sahi sang extreme weather conditions.
Gin-ako man sang opisyal nga may kabudlayan man sila sa pagbalik sa suplay sang kuryente kun may baha bangud mas ginahatagan sang prayoridad ang safety kag nagasunod lamang ang energization.
Isa naman sa ginalantaw nga benepisyo sang tag-ulan amo nga mapuno sang ulan ang reservoirs sang hydroelectric plants nga nagnubo anay ang mga lebel bangud sa El Niño. Ginalantaw suno kay Marasigan nga 15,000 megawatts ang mangin available kun magbalik na sa normal nga operasyon ang ininga hydroelectric plants.
Bangud nga amat-amat naman nagabugnaw ang temperaturakasunod sang deklarasyon nga nagsugod na ang rainy season, may nakit-an man ang ahensya nga pagnubo sa electricity demand.
Madumduman nga madamo nga power plants ang naka-eksperyensya sang outage nga rason sang yellow kag red alerts sang naglinigad nga binulan. Ini nga mga planta ang nagbalik na sa serbisyo sandig pa sa anunsyo sang energy department.
