Gin-athag sang Department of Health nga may yara sila sang ginapatuman nga mga pagsulundan sa insakto nga paggamit sang Personal Protective Equipment para sa mga health workers sang Covid-19.
Ini matapos nga nagpalab-ot sang pagkabalaka ang World Health Organization sa padayon nga pagsaka sang numero sang mga health workers nga natapikan sang nasambit nga balatian sa Pilipinas.
Suno kay Department of Health Undersecretary Maria Rosario Vergeire, nagabuligay ang World Health Organization kag Department of Health sa pag-imbestigar kun may yara sang health facilities sa pungsod nga wala nagasunod sa mga pagsulundan sang infection control.
Dugang pa sang natungdan, may ginagamit nga negative pressure isolation room ang mga ospital agud malikawan ang paglapta sang Covid-19.
Base sa record nga ginpagwa sang Department of Health, nagdangat na sa 1,062 ang numero sang mga health workers nga natapikan sang nasambit nga virus.
Sa nasambit nga numero 422 ang doktor, 386 ang mga nurse kag 30 naman ang mga medical technologists.
Lakip man diri ang 21 ka mga radiologic technologist, 51 nursing assistants, 152 nga gikan sa iban pa nga health services kaangay nalang sang administrative workforce kag barangay health workers.
Nagdangat naman sa 26 ang mga nagkalamatay lakip na ang 17 ka mga doktor.
