ILOILO – Bastante pa ang suplay sang real-time reverse transcription polymerase chain reaction (RT-PCR) test kits sa Western Visayas nga mahimo gamiton sa pag-test sa coronavirus disease 2019 (COVID-19) suspects.
Sa interview sang Bombo Radyo kay Dr. Ma. Sophia Pulmones, pinuno sang Local Health Support Division sang Department of Health (DOH) Region 6, iya ginpahayag nga as of June 25, santo sa data nga ginhatag sang duha ka accredited COVID-19 laboratory sa rehiyon, may yara pa sang 11,228 nga available nga RT-PCR test kits.
Apisar bastante, nagapabilin sa gihapon nga prayoridad ang pag-test sa mga symptomatic ukon nagapakita sang sintomas sang nasambit nga balatian.
Masunod man nga prayoridad amo ang mga COVID-19 suspects nga asymptomatic ukon wala sang sintoma apang naghalin sa lugar nga may madamo nga kaso sang COVID-19.
Gin-athag man ni Pulmones nga nagapadala man sang dugang nga suplay sang test kits ang DOH Central Office kag ang Research Institute for Tropical Medicine (RITM).
Dugang pa sang opisyal, may yara man sang mga local government units nga naga-procure sang ila kaugalingon nga test kits.
