PASSI CITY – Nagsungka sa otoridad ang driver sang Ceres Bus nga nakalasak sa 52 anyos nga lalaki sa Passi City, Iloilo.
Sa interview sang Bombo Radyo kay Police Staff Sergeant Roel Dave Navarro, imbestigador sang Passi City Police Station, iya ginpahayag nga ang driver sang Ceres Bus amo si Rogen Datar, 31 anyos sang Rizal St., Roxas City, Capiz.
Suno kay Navarro, ginpanindugan ni Datar nga wala niya natalupangdan nga na sideswipe ang biktima nga si Jonathan Gonzales sang Saligumba St., Poblacion Ilawod sang nasambit nga component city samtang nagamaneho sang motorsiklo.
Ginpahayag ni Navarro nga padulong sa Roxas City ang bus samtang padulong naman sa city proper sang Passi ang biktima sang natabo ang aksidente.
Mismo ang mga kaupdanan sa trabaho ang nagpahibalo kay Datar nga may lalaki nga nalasakan sang pang-ulihi nga royda sang iya ginamaneho nga bus.
Bangud nga natapos na ang reglementary period, ginpapauli na lang ang driver sang Ceres Bus kag nagpa-areglo naman ang pamilya sang biktima.
Matandaan nga wasak ang ulo sang biktima apang gindala ini sa hospital para opisyal nga deklarasyon sang doktor.
