Driver sang jeep, hugot nga ginapanindugan nga ginbutang lang sa iya bulsa ang suspected shabu sa ginpatigayon nga drug buy bust operation sa Guimaras

Hugot nga ginapanginwala sang driver sang jeep nga nadakpan sang mga personnel sang Philippine Drug Enforcement Agency (PDEA) kag Nueva Valencia Municipal Police Station sa drug buy bust operation.

Ang arestado amo si Juel Gambalan, 48 anyos kag residente sang Barangay Dolores Nueva Valencia, Guimaras.

Sa interview sang Bombo Radyo kay Gambalan, iya ginpahayag nga nagsakay mismo sa iya nga jeep ang lalaki nga nagdakop sa iya padulong sa Guisi.

Suno sa iya, ginbaklid kag ginpahapa siya sa diin ginapahayag nga ginbutangan sang lima ka sachets sang ginapatihan shabu ang iya nga bulsa.

Pahayag niya, wala siya nagagamit sang iligal nga droga kag wala man ini sang ka-transaksyon bangud sa pagkamatuod wala man siya sang cellphone.

Ginakakibot na lang ni Gambalan nga gindakop siya sang PDEA kag kapulisan.