Nagsugtanay ang Pilipinas kag Australia nga pabaskugon pa ang maritime security cooperation sa tunga sang tensyon sa West Philippine Sea.
Ini ang naistoryahan sa bilateral meeting nanday Foreign Affairs Secretary Enrique Manalo kag Australian Foreign Minister Penny Wong nga yari subong sa Manila para sa iya nga official visit.
Lakip sa maritime security and cooperation package sang Australia sa Pilipinas amo ang technical assistance kag capacity building para sa Philippine Coast Guard; paghatag sang equipment lakip na ang drone equipment training; kag ang training sa skills and technology agud nga mapauswag pa ang maritime domain awareness kag marine protection.
Magahatag man ini sang assistance agud nga mahagan-hagan ang malain nga epekto sa palibot kasunod sang natabo nga oil spill incident sa Mindoro.
Samtang, ginpahayag man ni Manalo nga posible nga makabisita si President Ferdinand ‘Bongbong’ Marcos Jr. sa Australia sa Marso sa masunod nga tuig.
Ang Marso 2024 amo ang ika-50 nga anibersaryo sang dialogue relations sa tunga sang Association of Southeast Asian Nations kag sang Australia. #
