MIAGAO, ILOILO – Duha ang patay matapos ang head-on collision sang duha ka motorsiklo sa Brgy. Mambatad, Miagao, Iloilo.
Ang mga biktima amo sanday Martin Millama sang Brgy. Palaca kag Jukka Samuli Tikkanen, finnish national kag temporaryo nga nagatinir sa Brgy. Igtuba sa nasambit nga banwa.
Sa interview sang Bombo Radyo kay Police Lt. Lunelyn Talamillo, deputy cheif of police sang Miagao Municipal Police Station, iya ginpahayag nga halin sa Poblacion kag nagapapauli na sa Brgy. Palaca si Millama sang natabo ang aksidente.
Suno kay Talamillo, ginapahayag nga gin-agaw ni Millama ang linya sang nagapadulong nga motorsiklo nga ginamaneho sang finnish national nga may yara sang fiance sa nasambit nga banwa.
Ginpahayag ni Talamillo nga wasak ang motorsiklo nga ginamaneho ni Millama kun sa diin sa tuman nga kabaskugon, wala gid nakahatag sang proteksyon ang ginasuksok nga helmet sang mga biktima nga lunsay naka-angkon sang mga patal sa nagkalain-lain nga bahin sang lawas.
Ginakabig nga accident prone area ang ginluntaran sang aksidente kag sa subong, natalana nga ipaidalom sa autopsy examination anng bangkay sang mga biktima.
