Na-file na ang duha ka counts sang frustrated homicide batok sa suspek nga ginaalegar nang-agaw sang pusil sang isa ka security guard sa General Luna, City Proper, gab-i sang Agosto 6.
Sa interview sang Bombo Radyo kay Police Captain Jesus Cambay III, Officer-in-Charge sang Iloilo City Police Station 7, iya ginpahayag nga duha ka separado nga complainant ang nagpasaka sang kaso batok sa suspek.
Ang una nga complainant amo ang security guard nga si Johny, nga amo ang ginaalegar gin-agawan sang pusil sang suspek samtang, ang ikaduha naman amo ang isa pa ka security guard nga si Dan.
Suno kay Police Captain Cambay, may kinamatarong ang suspek nga i-deny ang mga alegasyon batok sa iya.
Apang base sa imbestigasyon sang kapulisan kag sa mga CCTV footage nga nakuha sa crime scene, klaro suno sa opisyal nga indi act of self-defense ang ginaalegar nga ginhimo sang suspek.
Ginpahayag man ni Cambay nga may yara na sang anum ka previous cases ang nasambit nga suspek.
Ang duha ka counts sang frustrated homicide nga ginpasaka subong batok sa iya amo na ang iya ika-pito kag ika-walo nga kaso.
Lakip sa mga nauna nga kaso batok sa suspek ang may kaangtanan sa illegal nga droga kag disobedience to person in authority.
Nahibaluan man nga 17 anyos pa lamang ang suspek sang una ini nga mapasakaan sang kaso.
Sa subong, yara gihapon sa kustodiya sang Police Station 7 ang suspek.
