AJUY, ILOILO – Duha ang patay samtang isa ang pilason sa shooting incident sa Sitio Nabitasan, Brgy. Tipacla, Ajuy, Iloilo.
Ang magpakaisa nga ginbawi-an sang kabuhi amo sanday Rolly Herida, 45 anyos kag Alberto Herida, 43 anyos samtang pilason naman si Primitivo Herida, 65 anyos, lunsay residente sang nasambit nga lugar.
Sa exclusive interview sang Bombo Radyo kay Romeo Balino Jr., 37 anyos kag suspek sa krimen, iya ginpahayag nga antes natabo ang insidente, magka-upod pa sila nga nag-inom sa tyangge.
Suno kay Balino, nagbaisay sila nga tatlo apang sang hana na siya nga magbayad, hinali siya nga gindakop kag ginsumbag sang mga biktima.
Ginpahayag ni Balino nga nadulaan siya sang pangalibutan tubtub nga nakabugtaw siya kag nakita nga nagsaylo naman sa balay ni Primitivo Herida ang mga biktima kag samtang naga-inum, nabati-an niya nga siya ang gina-istoryahan.
Bangud sini, iya nga ginluthang sanday Rolly kag Alberto gamit ang .45 caliber pistol antes nagpalagyo.
Samtang, suno naman sa pagpaathag ni Police Captain Roy Castro, hepe sang Ajuy Municipal Police Station, nagbaisay ang tatlo kun sa diin nagbunot sang pusil ang suspek.
Bangud sini, gintuyo sang mga biktima nga dis-armahan ang suspek kag mismo ang tag-iya sang tyangge ang nagtago sang pusil.
Nagpauli na ang mga biktima apang nagpabilin pa si Balino sa tyangge agud kuhaon ang pusil kag sang nakuha na, ginpadulungan niya ang mga biktima kag ginluthang.
Si Rolly ang may duha ka pilas sa likod samtang si Alberto ang may pilas sa ulo, abaga kag puwak kag gindeklarar nga patay sang mga doktor.
Napilasan naman sa ilong si Premitivo nga naka-guwa na sa hospital samtang nagapabilin naman nga at large ang suspek.
Nakuha sa crime scene ang anum ka fired cartridges kag isa ka live ammunition sang .45 caliber pistol.
