ILOILO – Hugot kag padayon ang pagbantay sang munisipalidad sang Dumangas agud maprotektahan ang swine industry sa ila banwa batok sa African Swine Fever (ASF).
Sa interview sang Bombo Radyo kay Dumangas Mayor Ronaldo “Onal” Golez, iya ginpahayag nga may ara nahamtang nga mga checkpoints sa lugar agud masekyar ang mga nagasulod nga mga pork products.
Apat ang ila checkpoint areas kag ang mga ini ang nahamtang sa boundary sang Barotac kag Dumangas, isa sa boundary sa Dumangas kag Zarraga, isa sa dalan pakadto sa Zarraga, kag isa sa puerto.
Dugang ni Golez, ila man ginasigurado ang mga permit sang mga produkto nagikan sa Mindanao kag Manila, kag sa tion nga wala sang mapakita nga permit, ila ini ginapabalik sa ginahalinan nga lugar.
Suno kay Golez, nagalibot man ang mga meat inspector sa mga merkado agud madoble-lantaw ang mga baligya nga karne.
Iya ginpahayag nga mas maayo kon ginakuhaan sang sample nga produkto ang kada merkado kag mapadala sa nagakaigu nga ahensya agud madula na ang kahangawa sa ASF.
