ILOILO CITY – Suportado sang Environmental Management Bureau ang ginaduso nga pagpatukod sang pyrolysis plant may kaangtanan sa nagadamu nga medical waste sa syudad sang Iloilo.
Sa interview sang Bombo Radyo kay Forester Vicente Losbañes, pinuno sang solid waste management office sang Environmental Management Bureau 6, iya ginpahayag nga mas makapaayo kun may yara sang treatment kag disposal facility agud nga indi na pagdal-on ang medical waste sa iban nga lugar.
Suno kay Losbañes, indi mahimo nga pahamtangan sang pyrolysis plant ang populated areas bangud nga mahimo nga maglapta ang mga kagaw gikan sa medical waste.
Magluwas sa syudad sang Iloilo, mas makapaayo man kun magpatukod sang pyrolysis plant ang probinsya sang Iloilo agud nga indi na kinahanglanon ang pag-transport sang basura.
