ILOILO CITY – Nagpanindugan ang kampo ni anay Presidente Rodrigo Duterte wala siya nagpromisa nga kuhaon ang BRP Sierra Madre sa Ayungin Shoal sa West Philippine Sea.
Suno kay former executive secretary Salvador Medialdea, wala sang may ginpromisa si Duterte apisar nga nagpakig-alyansa ini sa Beijing kag kay Chinese President Xi Jinping sa tion sang iya administrasyon.
Pahayag niya, indi mahimo sang anay presidente ang nasambit nga butang bangud nahibaluan niya nga simbolo ini sang soberanya sang Pilipinas.
Ini ang sabat ni Medialdea sa akusasyon sang mga kritiko ni Duterte ilabi na ang pahayag nagikan sa progresibo nga Makabayan bloc nga ang anay presidente ang nag-deal sa Beijing nga kuhaon ang BRP Sierra Madre nga isa na ka guba-on nga World War II-era battleship nga nagaserbe nga outpost sang Manila sa Ayungin Shoal humalin sang ini ang grounded sang 1999.
Mangin sanday President Ferdinand Marcos Jr. kag former president Gloria Macapagal-Arroyo ang nagpanginwala nga may yara sang natabo nga kasugtanan.
Si Duterte nga nagserbe bilang presidente sang 2016 tubtob 2022 ang kilala sa iya foreign policy nga nagadistansya sa Estados Unidos nga madugay na nga kaalyado sang Pilipinas, sa baylo, nagapakig-alyansa ini sa China kag Russia.
Ginpahayag pa sang una ni Duterte nga ang desisyon sang Permanent Court of Arbitration nga nagapabor sa Pilipinas ang papel gid lamang kag wala sang pakadtuan.
Sang nagligad nga Hulyo, nagpakigkita si Duterte kay Xi sa Beijing kun sa diin, ginapahayag nga gin-istoryahan nila ang pagduso sang “friendly cooperation” sa tunga sang Pilipinas kag China.
