Ginalantaw sang Ilonggo football icon kag Azkals legend nga si Chieffy Caligdong nga makalab-ot sa Final Four sang FIFA World Cup 2026 ang defending champion nga Argentina kag ang powerhouse teams nga Spain, France, kag Brazil.
Suno kay Caligdong, napili sini ang apat ka nasambit nga teams indi bangud may yara sila sang star players kundi bangud sang istilo sang ila paghampang kag ikasarang sang ila individual players.
Ginkonsiderar man sini kun paano ini nga mga pungsod nag-umpisa sa qualification tubtub sa ila nga pagtapak sa World Cup.
Pahayag pa ni Caligdong, posible man nga makuha sang Argentina ang back-to-back championship.
Suno kay Caligdong, ginahingalitan gid sang Argentine team nga yara pa si Lionel Messi nga makabig gihapon nga delikado nga player kun yara ini sa attacking third apisar nga naga-edad na ini sang 39-anyos.
Sa imbukada nga hampang sang amo nga South American nation batok sa Algeria sa group match, naka-score si Messi sang hat trick ukon tatlo ka goals. Nagpatas na ini kay Miroslav Klose sang Germany bilang all-time leading scorer sa men’s World Cup history.
Nahibaluan nga ang katapusan nga pungsod nga nakakuha sang back-to-back title sa men’s FIFA World Cup amo ang Brazil nga nagdaog sang 1958 kag sang 1962.
Ang iban nga namensyonar nga teams ni Caligdong ang lunsay naman naga-uyat sang kampyonato sa World Cup — kampyon ang France sang 1998 kag 2018; kampyon ang Spain sang 2010; samtang winningest team naman ang Brazil nga nagdaog sang 1958, 1962, 1970, 1994, kag 2002.#
